المشاركات
يا صبية أم الثلاثين !!
" بدي أدور ع جوز " .. الأخرى " ومالك معجوقة !! روحي جيبي جوز وجبيلي معك حبة شوكالاته أم الربع دينار .. بسرعة قبل لييجي أخوكي الصغير ويلزق فيكي "
ترد عليها بقوة وحزم " لا لا بدي جوز .. قصدي جووز يعني زوج ! " الأخرى " جووز ! مالك انهبلتي ؟ ومين اللي بدور ع الثاني إحنا ولا هم ؟ "
ترد عليها " والله مش غلط إنو إحنا اللي ندور .. هيني قاعدة زي الطبرة .. ومش شايفيتني عنّست صار عمري 30 سنة "
الأخرى " طيب هيني زيك .. عادي الوضع طبيعي .. هو لساتك يا بنت بتفكري بالجيزة ! هاد حكي بنات صغار أمهات العشرينات ! إحنا كبرنا "
ترد عليها " طيب يا كبيرة .. مش بحكولنا البنات زي الهم ع القلب .. طيب وينهم عنّا .. ليش مش لاقيينا ؟ " الأخرى " لا هم أصلا مع كثرة البنات بطلوا ينشافوا .. يا حرام مساكين قلال "
فترد عليها " والله إنت المسكينة .. هم بتجوزوا .. وإنت بتروح عليكي يا صبية أم الثلاثين ! "
الأخرى بلا مبالاة " والله البركة بأبوي .. يلا عنّسنا وهو لساته بخلل فينا ومع ملح حياتنا بصير طعمنا من الآخر "
ترد عليها " بس بيني وبينك .. إحنا المفروض نروح ع الشباب نظلنا نلف وراهم لحتى يوقعوا فينا .. يعني كلمتين حلوات من هون وكلمتين من هناك عن فهمنا بالحياة .. ومن هان لهان لحتى يلينوا شوي .. وبعدين بتيجي مواهبنا بالإقناع "
الأخرى " بتعرفي ؟ والله لساتني بتذكر حكي أبوي زمان من لما كنت صغيرة .. كان دايما بحكيلي أنا بدي أجوزك لواحد دارس ومعاه مصاري كثيرة قد السما ! أحكيلك .. أنا ما بدي إياه دارس ولا حتى معاه مصاري .. أنا بدي جوز .. فستق حلبي .. أو عادي ما في مشكلة .. بس بدي واحد "
ترد عليها " والله يا صبية أم الثلاثين ! شكلو لازم أشوفلي واحد أتحايل عليه .. رح أحكيلو شوف يا حبيبي يا نور حياتي .. إنت يا حبيبي عليك شبابية وزلومية من الآخر .. أنا بما إني بحبك .. وإنت أكيد ( ومش بكيفك ) لازم تحبني .. مش إنت مسلم وبتآمن بكلام الله .. الله حكى " هل جزاء الإحسان إلا الإحسان " .. فأنا بشوف يا حبيبي إنو من مصلحتك إنك تتجوزني ! عارف ليش ؟ لأنو أنا إلى 30 سنة مصمدة بدون جيزة لأنو كانوا ييجوني عرسان كثار بس كنت أرفضهم مع إنهم مش بطّالين .. لأني والله كنت حاسة إني رح ألاقي فارس أحلامي الحقيقي اللي ما في بعدو حتى لو طال الوقت .. وأخيرا لقيتك .. يلا بسرعة خليني أكتب كتابي عليك ! وأنا رح أتكفل بنفقات الخطبة والعرس لأنو مش خسارة فيك .. يا عمي والله رجال "
الأخرى .. نظرة تعجبية علامتها عدم التعليق في محل الابتسامة بحسرة مفخمة تفخيم معنوي مؤكد .
بقلم : إياد أبو عرقوب
12 / 7 / 2010
كتبت بقلم إياد عمر أبو عرقوب
مضى من عمري ما يقارب 19 سنة ( 24 / 2 / 1991 ) .. مواليد عنيزة / السعودية .. جنسيتي فلسطينية من دورا الخليل .. أقيم في عمان / الأردن .. وأدرس هندسة الاتصالات || كاتب في وكالة تنفيس .. وأنشر أحيانا في جريدة الدستور الأردنية ( ملحق الشباب ) وفي العديد من الصحف الإلكترونية المنتشرة عبر الشبكة وأيضا مدوّن وهذه مدوّنتي ّ
0 التعليقات:
إرسال تعليق